Marrëveshja për demarkacionin me Malin e Zi, duhet të pezullohet deri në ndryshimin e qeverisë. Kështu ka thënë deputeti i Aleancës për Ardhmërinë e Kosovës, Lahi Brahimaj për Gazetën Monitor.
“Me e mira për këto procese e marrëveshje të dhimbshme do të ishte që të mbesin të pezulluara deri në ndryshimin e qeverisë, e kur do të jetë një qeveri me e guximshme dhe me e fortë atëherë të bëheshin ashtu si duhet”, ka thënë Brahimaj. Ai për Gazetën Monitor, ka thënë se marrëveshja e demarkaconit, është një tendencë për ta dëmtuar integritetin territorial të Kosovës.
“Nëse kjo marrëveshje, ky version do të kalonte tutje, e do të bëhej valide, jo vetëm që Kosova humb territorin, por do të bëhej një shembull shumë i keq për proceset tjera të demarkacionit, me Serbinë. Sepse Serbia pastaj do të thoshte që edhe ne kemi hise brenda Kosovës deri në kilometra të tëra. Ne këtë nuk e pranojmë asnjëherë, sikur nuk e kemi pranuar deri tani. Qeveria e Kosovës, ka bërë shkelje të vendimeve të Kuvendit të Kosovës, sepse nuk ka ardhur të raportojë për marrëveshjen para se ajo të nënshkruhej e jo pasi është ndërmarrë një hapë i tillë”, ka shtuar ai.
Sipas Brahimajt, kryeneqesia e kryeministrit Isa Mustafa për të kaluar me çdo kusht marrëveshjen në këtë version veç sa e tendosë situatën politike në vend.
“Ky kryeministër një përgjigje të madhe për këtë marrëveshje e ka marrë me 1 shtator në seancën e kuvendit. Opozita, në këtë rast po flas për Aleancën mund të jetë në një tavolinë dialogu me pushtetin , siç ka dëshmuar se është e gatshme në disa raste, vetëm nëse do të pranohet rishqyrtimi, e rishikimi i marrëveshjes së demarkacionit. Me e mira për këto procese e marrëveshje të dhimbshme do të ishte që të mbesin të pezulluara deri në ndryshimin e qeverisë, e kur do të jetë një qeveri me e guximshme dhe me e fortë atëherë të bëheshin ashtu si duhet”, është shprehur ai.
Brahimaj gjithashtu ka thënë se AAK është e gatshme për zgjedhje për të mirën e vendit.
“Ne si Aleancë jemi të gatshëm në çdo kohë që zgjedhjet të ndodhin, jo për të mirën tonë sa për të mirën e Kosovës”, ka theksuar ai për Gazetën Monitor.
Deputeti Brahimaj është shprehur se Qeveria e Kosovës, gjegjësisht koalicioni PDK-LDK-LS, nga fillimi nuk kanë sjellë shpresë për ndonjë ndryshim pozitiv për mirëqenien e qytetarëve.
“Fakti se në atë kohë u larguan mbi 100 mijë qytetarë, e tregon më së miri se si është filluar mandati qeverisës nga tri subjektet që i ceka me lartë. Për të vazhduar më tutje pastaj me zgjerimin e kapjes së shtetit nga LDK sepse PDK tashmë s’kishte ku shkonte tutje në këtë kuptim. Ky koalicion poashtu bëri marrëveshje të dëmshme e pati dështime të shumta në aspektin e jashtëm e atë të brendshëm. Asociacioni, një shtet brenda Kosovës, ishte tendeca për ta ndarë Kosovën, e papranueshme nga ana jonë dhe do të jetë e pafalshme prej qytetarëve për këtë qeveri. Marrëveshja për demarkacionin, tendenca për të falur tokë, na kanë marrë mjaftë ndër vite e dekada, kjo çka kemi arritur të shpëtojmë, për asnjë çmim nuk do të tolerojmë të na marrin edhe me tutje…për këtë kemi dëshmitarë e bashkë udhëtarë që ecëm bashkë në mbrojtje të integritetit e sovranitetit të Kosovës, qytetarët, të cilët shprehen kundërshtimin përmes peticionit mbi 200 mijë nënshkrimeve dhe protestave në disa raste me dhjetëra mijëra njerëz”, ka shtuar Brahimaj.
Ai gjithashtu i ka përmednur edhe dështimet në arritjen e njohjeve për vendin, në arritjen e objektivave për zhvillimin ekonomik, në anëtarësimin e vendit në organizata ndërkombëtare, siç rasti më UNESCO-n.
“Pastaj me e pafalshmja është mos vendosmëria e pafuqia e qeverisë për të krijuar Ushtrinë e Kosovës. Të gjitha këto, por edhe shumë të tjera që për shkak të hapësirës nuk po i përmend, na bëjnë me kuptu se Kosova sa ma parë që të shkojë në zgjedhje aq më mirë do të jetë për qytetarët e vendit. Për një rifillim të drejtë e zhvillimor”, ka pohuar ai.
Sot po mbahen zgjedhjet presidenciale në Shtetet e Bashkuara të Amerikës, ku kandidatë janë republikani Donald Trump dhe demokratja Hillary Clinton. Por, përveç votuesve të ShBA-së, preferencat se kush të jetë president, i kanë edhe udhëheqësit e Kosovës.
